Esti taller d’entamu ta concebíu como una estancia de trés díes dedicada al aprendizaxe y la práctica de distintes téuniques de bioconstrucción nun entornu natural d’escepcional valor paisaxísticu. A lo llargo d’estos díes participaremos nos llabores de caltenimientu de delles cabañes de teitu, construcciones tradicionales de piedra con cubierta vexetal. La propuesta consiste en formar parte de tol procesu constructivu, dende la recoyida y preparación de los materiales del entorno hasta la so aplicación y puesta n’obra.

Queremos afondar nel conocimientu del patrimoniu constructivu tradicional, fortalecer el venceyu col territoriu que habitamos y conocer los recursos que nos ufierta. Compartir tiempu y saberes con otres persones al rodiu del facer manual. Esfrutar de la montaña con tolos sentíos. Recuperar la construcción como un procesu humanu esencial pa la vida.